Деградацијата на почвата претставува сериозен глобален проблем што силно ги засега екосистемите кои се од суштинско значење за производство на храна, генерирање енергија, складирање јаглерод, прочистување на водата и регулирање на хранливите материи. Последиците од деградацијата вклучуваат намалување на здравјето на почвата, биодиверзитетот и продуктивноста, што доведува до значајни еколошки и социо-економски предизвици како што се појава на поплави, миграции и долгорочни штети врз животната средина.
За да се помогне во справувањето со деградацијата на почвата, ИПА АДРИОН – ECOBASE проектот има за цел да развие иновативни и одржливи стратегии за управување со почвата, се со цел справување со проблемот и неговите последици.
Како дел од активностите на проектот, тимот од УКИМ Земјоделски институт, Скопје предводен од проф. д-р Мукаетов, спроведе серија анкети меѓу земјоделските производители низ целата држава. Анкетите беа наменети за производители на различни земјоделски култури — вклучувајќи житарици, овошки, лозје и зеленчук — со цел да се добие јасна слика за тековните практики за управување со почвите и да се идентификуваат потребите и предизвиците поврзани со здравјето на почвата.
За време на процесот на анкетирање, засегнатите страни беа запознаени со целите и активностите на ECOBASE проектот. Секој учесник имаше можност да одговори на прашања поврзани со неговото учество во управувањето со почвите, особено со нивното познавање и вклученост во мерките за зачувување на истите.
Врз основа на собраните податоци, проектниот тим ќе спроведе SWOT анализа со цел да ги идентификува клучните недостатоци, потреби и предизвици кои треба да се надминат, со цел успешна имплементација на практиките за Одржливо управување со почвите (SLM).
